Një aksion policor në Kučka Korita, pranë Podgoricës, përfundoi me arrestimin e Mladen Janković, 40 vjeç, ish-punonjës policie dhe i dyshuar si anëtar i klanit kriminal “Shkaljar”. Në automjetin që ai po drejtonte, policia gjeti rreth 60 kilogramë marihuanë, për të cilën dyshohet se është kontrabanduar nga Shqipëria.
Sipas Policisë së Malit të Zi, Janković ka lidhje me një grup të organizuar kriminal, ndërsa ka qenë më parë pjesë e forcave të rendit, përpara se marrëdhënia e tij e punës të ndërpritej.
Kontrolli u krye gjatë një aksioni të koordinuar nga Qendra Rajonale e Policisë Kufitare “Centar”, e cila monitoron aktivitetin ndërkufitar dhe lufton kontrabandën e drogës. Gjatë kontrollit të automjetit tip “Suzuki Vitara” u sekuestruan dy çanta me material bimor jeshil – i ngjashëm me marihuanën – një palë targa të Republikës së Sllovenisë dhe një radio stacion.
Pas hetimeve, rasti iu referua Prokurorisë së Lartë të Podgoricës, e cila urdhëroi arrestimin e Janković për prodhim, mbajtje dhe shpërndarje të paautorizuar të narkotikëve.
Autoritetet theksojnë se veprimet policore janë pjesë e masave të vazhdueshme për sigurinë e qytetarëve, goditjen e rrjeteve kriminale dhe ndalimin e kontrabandës ndërkufitare.
