Zëvendëskryeministrja dhe njëherazi ministrja e Infrastrukturës dhe Energjisë, Belinda Balluku, ka bërë të ditur se ekipet e mirëmbajtjes së Autoritetit Rrugor Shqiptar (ARRSH) po angazhohen çdo ditë në pastrimin e akseve rrugore nga mbetjet e hedhura në mënyrë të papërgjegjshme nga drejtues dhe pasagjerë automjetesh. Në një postim në rrjetet sociale, Balluku theksoi se ndotja në vendpushimet rrugore ka marrë përmasa shqetësuese, pavarësisht punës së përditshme të punonjësve të ARRSH-së.
Ekipet e mirëmbajtjes së ARRSH kanë pastruar në bazë ditore akset rrugore, të tejmbushura nga mbetjet të hedhura në vendpushime, në mënyrë të papërgjegjshme nga drejtuesit dhe pasagjerët e automjeteve.
Ajo shtoi se ndërhyrjet e vazhdueshme nuk mjaftojnë për ta zgjidhur problemin nëse nuk shoqërohen me masa ndëshkuese ndaj ndotësve.
Punonjësit tanë kanë ndërhyrë në vijimësi, por kjo nuk mjafton.
Në këtë kuadër, Zëvendëskryeministrja njoftoi se Qendra e Monitorimit të Trafikut do të përdorë kamerat e saj jo vetëm për kontrollin e qarkullimit, por edhe për të identifikuar dhe gjobitur ata që ndotin rrugët kombëtare.
Qartesisht, kamerat të Qendrës së Monitorimit të Trafikut do të përdoren edhe për të gjobitur ndotësit të akseve tona kombëtare, deri në ndërgjegjësimin e plotë. Kërkohet angazhimi i të gjithëve për një mjedis më të pastër.
Ministria e Infrastrukturës dhe Energjisë u bën thirrje qytetarëve të tregojnë kujdes dhe përgjegjësi ndaj mjedisit, ndërsa paralajmëron se masat ndëshkuese do të jenë të paevitueshme për ata që shkelin rregullat.
