Kryeministri Edi Rama ka vijuar edhe sot komunikimin me qytetarët në rubrikën “Sy m’Sy”. Një nga qytetarët e pyet Ramën se kur do të bëjë një debat me kreun e Partisë Demokratike Sali Berisha, një praktikë kjo e njohur para zgjedhjeve në shumë shtete.
Kreu i PS ka zgjedhur të përgjigjet me ironi, duke u shprehur se me bufin nuk mund të bëhet debat. “Me kë të bëj debat me bufin e kënetës, je në vete apo jo? Aq më tepër kur bufi është në rrëshqitje e sipër”, tha ai, duke iu referuar kështu lapsuseve të bëra së fundmi nga kryedemokrati në takimet me qytetarët në kuadër të zgjedhjeve. Komunikimin Rama e ka mbyllur me “Më 11 maj ka vetëm një fitues”.
Përballë pyetjes “Çfarë ke bërë në 12 vite?”, Rama renditi disa nga arritjet që, sipas tij, kanë transformuar vendin duke e çuar në prag të Bashkimit Europian”.
“Kemi bërë 1 mijë kilometra rrugë europiane në mbarë vendin. E solla Shqipërinë në pragun e BE-së, kemi ndërtuar shkolla dhe spitale të reja,” tha Rama. Ai shtoi se një listë e plotë e punëve të bëra do të kërkonte “të paktën 10 ditë për t’u treguar”.
Kryeministri u ndal edhe te situata politike, duke kritikuar ashpër opozitën. “Këta nuk dinë të bëjnë opozitë, dinë vetëm të vetëshkatërrohen. Prandaj në zgjedhjet e ardhshme do të marrin rezultatin më të keq që nga viti 1997,” theksoi ai.
