Një 21-vjeçar humbi jetën mbrëmjen e djeshme si pasojë e një aksidenti të rëndë të ndodhur në aksin “Koplik-Dedaj”.
I riu humbi kontrollin mbi drejtimin e automjetit dhe për pasojë automjeti doli nga rruga. Për shkak të plagëve të marra, 21-vjeçari i identifikuar si Gjeto Gjonaj ndërroi jetë.
Drejtoria e Përgjithshme e Burgjeve ka reaguar në lidhje me këtë lajm tragjik duke zbuluar se Gjeto Gjonaj, ishte pjesë e strukturës së Policisë së Burgjeve.
Drejtoria e Burgjeve shkruan se Gjeto që humbi jetën në aksidentin tragjik kishte ëndrra të mëdha për të shërbyer në sistemin e drejtësisë, ëndrra që mbrëmë ju prenë në mes.
Statusi i Drejtorise se Burgjeve:
Drejtoria e Përgjithshme e Burgjeve dhe stafi i saj shprehin ngushëllimet më të thella për humbjen e Gjeto Gjonaj, një djalë i ri dhe i talentuar, pjesë e strukturës së Policisë së Burgjeve.
Gjeto, i cili kishte ëndrrat e tij të mëdha për të shërbyer në sistemin e drejtësisë, ndërroi jetë në një moshë shumë të re, duke lënë pas një dhimbje të madhe tek familja dhe të afërmit e tij.
Drejtori i Përgjithshëm i Burgjeve, së bashku me stafin, janë pranë familjes Gjonaj në këtë moment të vështirë, duke shprehur solidaritetin dhe mbështetjen e tyre për këtë humbje të pazëvendësueshme.
Gjeto do të mbetet gjithmonë në zemrat tona si një simbol i përkushtimit dhe shpresës për një të ardhme më të drejtë.
Do të kujtohemi gjithmonë për pasionin dhe dedikimin tënd.
Lamtumirë Gjet!
