Me mirëseardhjen për studentët dhe pedagogët nisi viti i ri akademik 2023-2024 në universitetin “Luigj Gurakuqi” të Shkodrës. Ceremonia zyrtare nisi me ekzekutimin e himnit kombëtar dhe atij të universitetit.
Në fjalën e saj përshëndetëse rektorja në detyrë Rajmonda Kçira foli për programet e reja të studimit dhe punën e bërë në përmirësimin e kushteve në këtë institucion të arsimit të lartë. Ajo kërkoi angazhimin e të gjithëve për të vijuar këtë rrugë të nisur 65 vite më parë, me objektivin për të qënë një qëndër e rëndësishme e dijes. 895 studentë ulen për herë të parë në auditore nga të dhënat e deritanishme të dy fazave të regjistrimit.Rektorja Kçira thotë se nuk flitet për mbyllje degësh por mund të ketë mos aktivizim të tyre, edhe pse nuk gjenden në këtë situatë.
“Risitë e këtij viti akademik janë tre programe të reja, normalisht që tërheqin më shumë studentë, ka infrastrukturë të përmirësuar dhe laboratore të reja.
Janë çregjistrimet këto dy ditë, dhe regjistrimet në datën katër. Deri tani janë 895 studentë të regjistruar. Mbi 100 janë në programe profesionale, risi kjo për universitetin.
Qeveria ka marrë masa për financimin e studentëve që regjistrohen.Unë shpresoj që do të ketë një zgjidhje. Për momentin jemi në fazën e regjistrimeve të reja.
Nuk flitet për mbyllje programi, flitet për aktivizim programesh. Asnjë nuk mundet të mbyllet. Shpresojmë për më të mirën!”, tha rektorja.
Studentët ekselent të këtij universiteti ndanë mesazhet e tyre në këtë ditë të rëndësishme për ta, pasi rruga e dijes mbetet e mbushur me sfida. Në të gjitha ciklet e studimit në universitetin “Luigj Gurakuqi” marrin dije rreth 5 mijë studentë, një numër që vitet e fundit ka ardhur duke u tkurrur në atë që cilësohet si kriza e përgjithshme e sistemit arsimor shqiptar.
