Më 4 nëntor 1990 ishte një ditë historike për Shqipërinë. Dom Simon Jubani do të mbante meshën e parë duke shënuar kështu rënien e komunizmit 33 vjet më parë.
Dom Simon Jubani, mё 4 nёntor 1990 kremtoi Meshën e parë në varrezat e Shkodrës duke sfiduar terrorin e diktaturës komuniste e duke bërë të shpërthente fuqia e lirisë mbi diktaturën, fuqia e së mirës mbi të keqen, e dashurisë e vëllazërimit mbi urrejtjen e përçarjen. Mesha e kremtuar nga dom Simoni hodhi themelet e lirisë e të demokracisë në Shqipëri pas dimrit të egër e të gjatë të imponuar nga komunizmi.
Prifti shkodran dom Simon Jubani njihet si një nga njerëzit e meshtarët shqiptarë që ka vuajtur tërë jetën në burgje komuniste dhe që u ka qëndruar besnikërisht e heroikisht torturave të tmerrshme të ushtruara nga regjimi komunist ndaj të gjithë atyre njerëzve e qytetarëve që nuk mohonin vlerat shpirtërore, kulturore e kombëtare as para dënimeve, persekutimeve e vrasjeve. Kështu mund të pohojmë se kremtimi i Meshës së parë më 4 nëntor 1990 në varrezat e Rrmajit, qe shprehje e asaj fuqie shpirtëror hyjnore e njerëzore që diktatura komuniste nuk arriti kurrë ta çrrënjoste nga zemra e nga shpirti i shqiptarëve besimtarë. Dom Simon Jubani u bë kështu nismëtari i rihapjes së Kishave e Xhamive në Shqipëri kur komunizmi ende nuk ishte rrëzuar. Kleri dhe Kisha Katolike u bënë edhe një herë shkëndija që rifitoi lirinë e rivendosi demokracinë në Shqipëri.
Statusi i dom Artur Jaku, rektor i shenjtores “Nëna e Keshillit të Mirë”:
Më 4 nëntor 1990 dom Simon Jubani, bâni një Shqipni me shpresu!
Mesha e parë ishte fryt i zgjedhjes së vështirë, i zgjedhjes flijuese, kunder rrymes, kunder privilegjeve, ishte zgjedhje besnikërie ndaj amanetit të të parëve.
Mesha e parë, është vendi i katedres së lirisë, manuali sesi ideali mbrohet me qëndres, frika mposhtet nga guximi, dhe e vërteta ngadhënjen mbi gënjeshtrën.
Prandaj sa herë të kerkojmë të hulumtojnë mbi të kaluaren tonë, mbi figurat që ndërtuan shtetin, kishën, kulturën, Shkodrën, aty është ndalesa e padiskuteshme.
Sepse aty flejnë me Zotin Kol Idromeno, Pjetër Marubi, Simon Rrota, Prenkë Jakova, Pjetër Gaci, dom Gjon Gazulli, Atë Anton Xanonit, Dom Ndoc Nikajt, Dom Ndre Zadejës, Dom Simoni etj.
